Aurreko larunbatean, ekainaren 18an, Nafarroan izan ginen, Eugi herrian hain zuzen ere. Lehenengo aldia da Haurtzaro Dantza Taldea Eugira joaten dela eta oso esperientzia polita izan zen. Goizeko 9:15etan gelditu ginen Ikastolako parkinean Eugiruntz abiatzeako, bidaia besteetan baino luzeagoa baitzen.
Bertara iritsi eta herriko frontoian elkartu ginen beste dantza taldeekin eta bertan haimaiketako goxoa egin genuen dantzan hasi aurretik. Eguraldia zela eta, hasiera batean emanaldi guztia frontoian egitea erabaki zuten bertako antolatzaileek, baina hala eta guztiz ere, eguzkia atera nahian zebilenez herrian zehar desfilea burutu ahal izan genuen.
Jarraian, esan bezala, frontoian bildu eta emanaldiari hasiera eman genion. dantzari guztiek Agurra eta Agintariarena elkarrekin dantzatu zituzten. Ostean, dantza talde bakoitzak 10 minutuko ikuskizuna eskaintzeko tartea izan genuen eta guk honako dantza hauek eskaini genituen: Belauntxingo, Alpargata, San Juan Zortzikoa eta Igitai Dantza. Eta azkenik, goizari amaiera emateko dantzari guztiek berriro ere elkarrekin Txaperoak, Ipurdi Dantza eta Lantzeko Zortzikoa dantzatu zituzten, jarraian kalejira alai eta luze batekin amaituz.
Bazkaldu ere frontoian bertan egin genuen, antolatzaileek sukaldatutako paella handi eta goxoa janaz. Oso gustora egon ziren Haurtzaro Dantza Taldeko dantzariak elkarrekin, eta bazkaldu ostean, kanpora irten eta jolasten aritu ziren. 16:30ak aldera berriro ere autobusera igo eta Oiartzunera buelta egin genuen.
Oso egun polita izan zen, herri berri bat ezagutzeaz gain primeran pasa eta esperientzia berria izan zen.
Mila esker zuen dantzari txikira gonbidatzeagatik eta baita hurbildu ziren guraso eta lagunei ere!
Eskerrik asko Asier Etxebesteri ere argazkilari lanetan aritzeagatik!
