Zumaiako Dantzari Txiki Eguna

Igande honetan, ekainaren 4an hain zuzen, Haurtzaro Dantza Taldea Zumaian izan zen Dantza Txiki Egunean. Talde Laranjari, Talde Berdeari, Talde Txuriari eta Gerezien Taldeari egokitu zitzaion bertara joan eta ikasturtean zehar ikasitako dantzak plazer handiz erakustea.

Goizeko 10:00ak aldera abiatu ginen Oiartzundik eta segituan iritsi ginen bertara. Azken ensaioak eta prestaketak burutu eta hamaiketako goxo goxoa egin ondoren Zumaiako kaleetan barrena abiatu ginen desfilean eta dantzan. Dantza ugari erakutsi genizkien bertara hurbildu zirenei, hala nola, Agurra, Ezpata Dantza, Txontxongilo, Uztai Haundi eta Txulalai.

Goizari amaiera emateko, herriko plazan bildu ginen dantzari guztiak eta bertan, dantza talde bakoitzak pare bat dantza dantzatu zituen. Beraz, Haurtzaro Dantza Taldeak San Juan Zortzikoa eta Belauntxingo dantzatu zituen. Amaieran, kalejira alai batekin bukatu genuen goiza.

Dantzariek etxe eta familia ezberdinetan bazkaldu ondoren, berriro ere plazan elkartu eta bertako erromeriaz disfrutatu ondoren 18:00ak aldera autobusa hartu eta gure herrira itzuli ginen.

Oso egun polita izan zen. Dantzariek ederki dantzatu eta primeran pasa zuten. Mila esker antolatzaile eta laguntzaile guztiei, egun bikaina izan baitzen!